Slidre kulturbarnehage er ein LØFT-barnehage. Dette betyr at vi har fokus på løysingar i staden for problem. Vårt mål er å gje ungar reiskap for aktiv og positiv læring ved å fokusere på det ungane kan og klarer, samstundes med å gje dei utfordringar som passar deira alder og modning. Dette meiner vi vil styrke dei på vegen vidare, og gje dei ein god ”ballast” å ta med seg vidare i livet.

Vi er ein barnehage som fokuserer på natur, kunst, nærmiljø og samfunn. Tradisjonar er også noko som er viktig for oss.

Natur

Vi har flotte naturområde rett utanfor døra som verkeleg legg til rette for leik, læring og bevegelsesglede, dette i tråd med Rammeplan for barnehagen. Naturen er også ein flott arena for sosial utvikling, samt kreativt arbeid. Det er også viktig for oss at borna gjer seg opplevingar og erfaringar som kan fremje forståing og respekt for naturen.
 

Kunst

Borna skal få moglegheit til å utfolde seg kreativt og få kjennskap til ulike måtar å uttrykke seg. Song og musikk er viktig for oss i barnehagen, då dette er eit universelt språk som gjer noko med oss – både små og store. Vi har eit godt samarbeid med kulturskulen i Vestre Slidre, og kan mellom anna tilby borna «musikk i barnehagen», med kulturskulelærarar.

Nærmiljø og samfunn

Gjennom forsking, opplevingar og erfaringar skal barnehagen bidra til å gjera borna kjent med eiget nærmiljø, samfunn og verda rundt. Dette jobbar vi med gjennom ulike tema i løpet av barnehageåret. Vi er heldige som held til «midt i smørauget», alt ligg til rette for at vi skal bli godt kjent og få varierte opplevingar her i Slidre.  Vi har kort veg til mellom anna kommunesenter, bibliotek, helsetun, skule og kulturhus.